CECAFA Kagame Cup: Amakarita y’umuhondo ashyize Rayon Sports ku mwanya wa kabiri mu itsinda B

Yanditswe 06.07.2018 na Rayon Sports saa 08:10 | Yasuwe : 653

Nyuma y’umukino Rayon Sports yatsinzemo LLB ibitego 3-1 bikayihesha gukomeza muri 1/4, haraye hitabajwe itegeko rya FIFA rirebana n’umwanzuro ufatwa igihe amakipe abiri anganya ibintu byose (FIFA fair play rule) kugira hagati ya Rayon Sports na Gormahia haboneke ikipe iza imbere y’indi.

Imikino ya nyuma yo mu itsinda B yarayaye ishojwe Rayon Sports ibonye amanota atatu ku ntsinzi y’ibitego bitatu bya Rwatubyaye, Kevin Muhire na Pierrot, mu gihe Gormahia nayo yatsindaga AS Port ibitego 2-0. Ibi byatumye aya makipe yombi anganya amanota 5, ibitego azigamye (+2), n’ibitego zinjije (6) ibitego zinjijwe (4).

Kubera ko ntacyo amategeko ya CECAFA asanzwe ateganya igihe ibintu bimeze gutyo, hiyambajwe itegeko rya FIFA ryo rikaba riteganya ko ku kibazo nk’iki harebwa ikipe yitwaye neza (fair play), ni ukuvuga iyabonye amakarita make. Ni muri urwo rwego rero ikipe ya Rayon Sports yabaye iya kabiri kuko yabonye amakarita menshi y’umuhondo (5) mu gihe Gormahia yagizwe iya mbere mu itsinda kuko yo yabonye amakarita 4 gusa.

Nyuma y’iki cyemezo ikipe ya Rayon Sports izahura na AZAM yo muri Tanzania mu gihe Gormahia izahura na Vipers yo muri Uganda. imikino iteganyijwe ku cyumweru no ku wa mbere. Dore uko imikino iteye:

Ku cyumweru, 8/7/2018
Gor Mahia vs Vipers SC
Simba SC vs AS Ports

Ku wa mbere, 9/7/2018
Azam FC vs Rayon Sports FC
Singida Utd vs JKU

Tanga igitekerezo

Leave a Reply